嚴選 5 個最適合女仔獨遊的地方

將多年的獨遊心得送俾大家享用，以安全、多野玩、多靚仔、影相靚等幾個準則嚴選5個最適合女仔獨遊的地方。

1️⃣西班牙巴塞隆拿 Barcelona, Spain

優點：住宿平，交通方便，名勝古蹟夠集中
缺點：冇缺點
重點推介：山頂泳池游水

巴塞隆拿是個非常容易玩的地方，初次獨遊都適合。出入搭地鐵就得好方便；全城極多藝術古蹟，隨便影張相都好靚。上次我住 Airbnb，兩個屋主都好靚仔同有六舊腹肌；去到Barceloneta 沙灘，基本上90%後生仔都有六舊腹肌。。。除了最出名的名勝古蹟外，屋主介紹我去的 Mount Juic 山頂泳池是塊 hidden gem！一邊游水一邊飽覽全市景色，非常特別的經歷。

小貼士：高廸公園和大教堂最好預早訂飛；去山頂泳池就要留意開放時間和購票方法。

2️⃣印尼峇里島 Bali, Indonesia

優點：住宿平靚正，影相好靚，容易識朋友
缺點：交通不便，著名景點多小販
重點推介：學滑浪

峇里島在東南亞小島之中應該是最適合女仔去，治安好，住宿多選擇，周街都有靚靚 coffee shop。自然環境靚之餘，傳統建築物都好有品味；食物質素高又多健康選擇。最推介是學滑浪！我試過兩間滑浪學校，位於 Kuta Beach 的 Odyssey Surf School 和位於 Seminyak 的 Kima Surf。 Odyssey 教得好包學識又平；Kima Surf 就是間歐洲人開的滑浪旅館，一站式服務；住客是來自世界各地的年青人，大部分是獨遊，你就算一個人去都大把人陪。

3️⃣ 瑞士 Switzerland

優點：地方好乾淨，勁勁勁多靚仔，空氣好
缺點：住宿貴，食野貴，乜都貴
重點推介：三角朱古力雪山 Matterhorn

食物，住宿，交通工具全部極高質素，雖然貴但會值回票價。我在Luzern住了一星期，每日行行下就見到白天鵝；行行下又見到靚仔，四方八面都是賞心悅目的景色。有日去 Zurich 行下，到放工時間返火車站，嘩勁多靚仔湧出來😮 風景方面我就推介大家去Zermatt，一落火車就是個童話式小鎮，再搭鐵路上 Gornergrat 山頂，可以直望三角朱古力雪山Matterhorn。上到山頂360度只有白色和藍色，是個洗滌心靈的好地方。另外，我在IG 看到山上原來有小旅館可以一訓醒就看到Matterhorn，有機會都想試下。

4️⃣ 泰國布吉島 Phuket, Thailand

優點：住宿平，野食平靚正，局部地區多靚仔
缺點：交通不便
重點推介：Chalong 學泰拳、上健身班

世界各地有好多健身愛好者會去布吉島的 Chalong區「進修」！成條街滿滿是 fit 到漏油的後生仔女。因為又安全又平，布吉島也是個熱門女性獨遊目的地，在當地上泰拳班可以輕易識到其他獨遊女仔約埋一齊玩。住宿方面只要在搜尋器的地點上打 “Unit 27” 就可以找到「健身街」的精品旅館，住在那條街每日一落樓就可能上各式各樣健身班，同區還有大量靚靚 coffee shop 和供應增肌減脂食物的餐廳。坐在那些開放式餐廳，每分鐘都可看到 Avengers 身形的男人行過（女仔都好靚），令你好有動力日日做運動。

5️⃣法國巴黎 Paris, France

優點：實景同影相都好靚，交通方便，多靚仔，咖啡正
缺點：住宿貴，著名景點多乞丐
重點推介：學法文

幾年前單身的時候去巴黎學法文。。。有兩個高質艷遇，在FB分享後有很多讀者問學校名，我再介紹多次間學校叫 Accord，教得好好，我學了一星期已經可以用法文叫野食和介紹自己～學校位於 Opera，我的Airbnb在步行距離內的 Rue Montorgueil；又好近羅浮宮，總之好方便。巴黎的氣氛就是很浪漫，第一星期在法文班遇上年輕德國大學生；第二星期在 Toast Master event 遇上高大法國MBA 學生。。。那年在香港dry 爆，去到巴黎竟然兩星期就有「得著」。幾個月後法國人來香港探我兼一齊倒數新年；德國人翌年夏天就約我一齊去西班牙～現在大家都各有各發展，過去的都是美好回憶❤️