帶阿媽去旅行辛苦過返工，出錢出力又要遷就佢；當下有時好激氣，不過每去完旅行返黎就會當笑話睇。
1️⃣ 問我咩叫「倉務客位」
有次我用里數換左張 PEY 機票俾媽咪黎新加坡探我，返緊工無啦啦收到媽咪電話，好緊張話有人打俾佢，個位轉左做「倉務客位」，問我即係咩。講完一輪原來架機轉左型號，冇 PEY 位所以要 upgrade 佢上Business Class 商務客位。。。我喺公司忍笑忍得好辛苦。
2️⃣ 帶齊所有違禁品
有次同媽咪飛去澳洲探家姐，過關時個海關人員忽然神色凝重，截停媽咪話要打開個袋，話個袋懷疑藏有武器！而個武器係把大鉸剪！我哋心諗點解會有大鉸剪，點知原來係個大餸夾！X光屏幕見到又真係好似大鉸剪，個海關見到都笑左。過完關，媽咪如常地拎出熱水壺飲熱水，咦！點解海關俾你過裝滿水嘅樽嘅？原來個海關俾把大鉸剪嚇親，唔記得咗睇個熱水壺，咁都過到骨。
3️⃣我影阿媽 vs. 阿媽影我
見到條街幾靚，想影張相，我影媽咪嗰張正正常常；媽咪影我就要等到有架車行過，又有個人過緊馬路，仲要將個鏡頭斜向地下先至影。
4️⃣ 所有英文留俾我講，直至。。。
請媽咪去星加坡探我，每次出街所有英文都留返俾我講，攞張紙巾都要我問侍應，話自己唔識英文。點知到我帶佢去做瑜伽，落堂轉個頭唔見咗媽咪，原來佢自己走咗去同個靚仔教練傾計！我聽到佢話 “it’s my first time doing yoga” 又話人哋教得好好等等，英文忽然間好流利！激死我！
5️⃣ 係人都話靚仔，又要合照
去到意大利一落飛機，媽咪求其見到個肥仔都話靚仔。一出街，就係人都話靚仔，意大利男人好熱情，尤其是服務業嗰班對我阿媽態度超好，搞到佢暈晒大浪，又成日話要同人哋合照。的士司機、麵包師傅都影一餐，最後呢個Pizza師傅我都認同係幾靚仔。
旅行之後。。。
返到黎有Jet lag 覺得好威，又用盡任何機會同親戚朋友講自己去過意大利。
小貼士。。。
其實最重要貼士係，趁父母仲行得走得，自己又有經濟能力時及早帶一兩次，老人家出門就係越老越難服侍。而且。。。透露少少，其實我係因為阿媽年半前大病所以回港，當時情況好差，媽咪猛話好在前幾年有去意大利，以後唔知會點。經過大半年化療之後佢已經完全康復，好返之後都去左兩次旅行。件事完左寫返出黎好似好易，之前全年不停出入醫院其實極辛苦。老人家好多野話唔埋，身體可以一時間有好大變化，所以旅行要趁早。
❤️❤️❤️
Chairwoman 