一班人食飯有「走肉朋友」又有食肉獸就得邊個？其實我就係個走肉朋友，但我又唔想去齋舖；純素餐廳又難搵又貴；同朋友食飯又唔想表現得太麻煩，可以點？綜合呢兩年經驗，介紹番幾個有素食又適合同食肉朋友一齊食飯嘅好地方。
1️⃣坐忘 Camper’s (鰂魚涌、天后）
- 優點：晚餐$100有找，高蛋白質素食
- 缺點：次次去都要等位
15 種野菜咖喱飯真係無得輸，勁高蛋白質，番薯飯好特別，自己去街市買整15 種蔬菜都會貴，喺度食真係好抵。其他想食肉嘅朋友都好多選擇，唔會覺得自己陪緊我食素。不過真係勁多人等位，夜晚去通常要排隊，食完又唔敢坐得耐，平靚正嘅缺點就係會引好多人黎 😅
🍅🍆🥑🥦🌶🌽🥕🥒🥔🍠
2️⃣Pizza Express （全港九都有分店）
- 優點：坐得好舒服，食物質素高有營養
- 缺點：會貴少少
呢間不嬲都多素食選擇，最近仲出咗個高蛋白質無肉餐單。咁啱我去開個健身班（肌本野）又比佢邀請合作，上個月成班同學嚟試食新餐單，真係碟碟都好好食，又有超多牛油果🥑菜式。平時食開肉嘅同學都好鍾意，另外亦有多菜少肉嘅非素食選擇，果汁都好正。
🍅🍆🥑🥦🌶🌽🥕🥒🥔🍠
3️⃣The Point （尖沙咀、銅鑼灣、將軍澳）
- 優點：坐得好舒服，嘢食好味
- 缺點：食物有時比較heavy
係將軍澳運動場跑步後發現呢間餐廳，每日午餐餐牌都有素食選擇，而且好好食又飽肚。銅鑼灣同尖沙咀都有分店，有肉又有素好多選擇。食物方面係意粉或者pizza，都幾heavy，跑完步食剛剛好，但平時食就有啲肥，要小心選擇份量。
🍅🍆🥑🥦🌶🌽🥕🥒🥔🍠
4️⃣Al Molo （尖沙咀）
- 優點：環境非常靚，自助餐有貴價蔬菜e.g. kale！
- 缺點：每人二三百蚊買單
環境靚到好似去咗意大利，午餐同晚餐都有 à la carte 同自助餐選擇。自助餐多菜少肉，全部貴野，有羽衣甘藍同石榴籽等等，放喺度俾我哋任食。樣樣都好好味；連杯凍檸茶都特別好飲。影相又好靚，雖然貴都貴得幾抵。
🍅🍆🥑🥦🌶🌽🥕🥒🥔🍠
5️⃣Simplylife （全港九都有分店）
- 優點：周圍都有分店，日日餐牌都有素食
- 缺點：素食選擇較少蛋白質
食素人士出街食飯 Simplylife 真係救星，每日午餐、下午茶、晚餐都一定有素食選擇，又周圍都有分店。試過幾次都好好食，不過有時幾個選擇都毫無蛋白質，所以要睇清楚門口餐牌先好行入去。
🍅🍆🥑🥦🌶🌽🥕🥒🥔🍠
肉食行業佔全球碳排放量至少20%，轉食素可以身體健康之餘，仲可以減輕全球暖化問題。有人指食素會唔夠營養，我研究左一年以上，大概知少少。人需要各種營養，包括維他命、蛋白質同鐵質等等。其實只要識得食，食肉同食素營養方面差唔多。例如西蘭花、牛油果同各種豆類都含高蛋白質，只要食得啱其實會有營養過食肉。不過有營養師指出魚類所含嘅維他命對人類很重要，蔬菜唔能夠代替，所以素食人士通常會加食維他命丸，或者間中要食魚。我自己就選擇盡量食素，有時一餐半餐食同其他人一齊肉食魚冇所謂，自己一個人就食素，做得幾多得幾多。
Chairwoman 