介紹返三條靚到以為自己去咗外國嘅香港行山路線，有高中低難道選擇，唔使搭飛機都可以搵返去旅行嘅感覺❤️
1）南大嶼山分流
分流應該係我喺香港行過最靚嘅路線，全長16公里勁多打卡位，個個都靚都wa wa 聲，行咗六個幾鐘冇見過其他人，好似去咗外國啲郊野地方咁。
石壁水塘 ➡️ 狗嶺涌 ➡️ 嶼南界碑 ➡️ 分流石荀 ➡️ 南層樓觀海平台 ➡️ 狗嶺涌觀景台 ➡️ 返轉頭或者繼續行去二澳大澳走
呢條山徑算係好易行，平路多起伏不大，只係路程比較長，記得自己帶夠食物同水就OK。途中會見到分流石筍，係一舊巨石，有山路可以行過去，但係之後你仲會見到有個天然大石平台叫南層樓觀海台，唔會有路牌亦唔會有山路，要自己喺叢林跟住絲帶指示行過去。個平台大概可以坐五六個人，圍埋一齊野餐就最開心，不過要小心唔好跌咗落海。如果有機會再去，一日係唔夠，狗嶺涌營地同大浪灣營地都好靚，有時間留一晚露營都唔錯。
詳細交通及路線參考：https://www.timhiking.com/blog.php?d=20180507
由於當日係朋友揸車喺石壁水塘落車，我哋行到去分流之後要返轉頭。如果搭公共交通工具，就可以一直行落去二澳再去大澳搭車走。其實就算要返轉頭攞車都唔怕，因為啲景實在太靚可以睇多次。
2）石澳 鶴嘴山
本身只係諗住去鶴嘴睇蟹洞，交通方便亦完全冇難度，但由於同行朋友實在太不甘於平淡，我哋未去到蟹洞已經爆一次林落機艙堡；去完蟹洞又上鶴嘴山變電站爆林入石澳正灘，條路線就由冇難度變咗高難度，連影相行左成七個鐘。 爆林嘅意思就係喺冇山路嘅情況底下，用身體衝破叢林行過去。叢林之中唔會有明顯嘅路線， Google Map都幫你唔到，要跟着挷喺樹枝上嘅絲帶前行。全程會好擔心搵唔到下一條絲帶，搵到又會好開心。
筲箕灣搭 9號巴士鶴嘴落車 ➡️ 機艙堡➡️ 蟹洞 ➡️蟹洞上面個山 ➡️鶴嘴山變電站 ➡️跟絲帶 ➡️石澳正灘
蟹洞應該好多人都去過，都知道有幾靚，如果想特別少少就去埋機艙堡。由於冇完整山路，機艙堡係比較少人去，景色好特別又好靚，坐低望住個海食少少野都幾chill。另外有鶴嘴山變電站落石澳正灘嗰段，爆林係好辛苦，但係景色真係一流，可以望晒成個石澳，好似去咗外國咁，之前行幾次龍脊都睇唔到咁嘅景色。
當然同行朋友體力要有返咁上下，亦要有足夠食物同水。由鶴嘴山落石澳爆林嗰段用咗三個幾鐘，全程冇見過其他人，所以同行嘅人一定要有足夠行山經驗，如果唔係會幾危險，新手千祈唔好試。
3）玉桂山 鴨脷排
由利東站出發，去到巴士站後面有條小路上玉桂山，呢條路線嘅起點好唔尋常，但係開始咗之後條山路都OK嘅。上到玉桂山其實都係見返成個石屎森林，不過戲肉就係落去另外一邊鴨脷排。由山頂落沙洲一段係非常斜，行山經驗比較少嘅我要全程捉住條麻繩細細步行落去。唔少人去到沙洲就會返轉頭，不過如果繼續前行去鴨脷排，到盡頭會見到燈塔同個小碼頭。眼前再見唔到高樓大廈，只係天空丶海丶小島丶燈塔同幾隻帆船，好有渡假嘅感覺。全程其實只係兩三個鐘，唔算太辛苦，去到燈塔如果唔想行返轉頭仲可以喺碼頭搭船仔返香港仔搭地鐵，交通非常方便。
利東港鐵站 ➡️巴士總站後面黃色欄杆 ➡️ 玉桂山 ➡️ 鴨脷排 ➡️ 燈塔 ➡️ 搭船或返轉頭
咁嘅時勢都唔知幾時先可以再開開心心去旅行，所以近排都係留喺香港發掘下有咩可以玩。除咗行山之外，其實獨木舟都可以去好多特別嘅地方，下次再介紹。
❤️❤️❤️
Chairwoman 