話說我早前喺 IG post左張相話自己食緊 High Tea，張相係間五星級酒店影，有個港女三層架裝住啲嘢食，即刻有朋友DM 我話呢啲唔係叫 High Tea 係叫 Afternoon Tea！
留意番，喺酒店食果種三層架英式下午茶係叫 Afternoon Tea，大概係上流社會人士下午一路嘆茶一路食scones ／三文治／蛋糕仔等嘅下午茶餐，由於多數係用比較矮嘅茶几，所以亦叫做 Low Tea。
咁究竟乜嘢叫做 High Tea呢？原來都係英式傳統野，係指黃昏又未到夜晚時候食嘅輕盈餐。工業革命之後勞動階層唔可以再三點幾食下午茶，唯有等到夜少少放咗工先可以食。High Tea 都係有茶飲，食物方面就會比較豐富，會有魚有肉多熱盤。由於係比較高嘅枱櫈度食，所以叫 High Tea，其實完全冇 high class 嘅意思。
Any肥，呢兩個月試左幾間適合食下午茶同打卡嘅餐廳，每次都影好多相又有好多人問係邊度同好唔好食，宜家一次過分享下：
- Tiffin at Grand Hyatt Hong Kong 香港君悅酒店 茶園
- 環境 ⭐️⭐️⭐️⭐️⭐️
- 食物 ⭐️⭐️⭐️⭐️⭐️
- 服務 ⭐️⭐️⭐️⭐️⭐️
- 打卡 ⭐️⭐️⭐️
Tiffin 堅好食，每舊嘢都好有心思，一開始個牛角包已經有驚喜，之後粟米批同龍蝦批都好好食。 除咗三層塔之外仲有任食 gelato, 生果同 crepe。服務超級好，態度輕鬆友善有禮；瓷器好靚係日本牌子 Narumi (原來Sogo有得賣) 。值得一提嘅係… 彈琴果個人… 竟然全程彈廣東歌同國語歌，仲要係2000年代嗰啲… 燕尾蝶丶野孩子丶仲有欣宜同容祖兒嘅歌，成個 vibe 變咗大學時代嘅 Neway CEO 😳 環境方面，平日去近乎係包場，得兩三枱客，有好大社交距離，張梳化坐得好舒服；但由於 Grand Hyatt 真係歷史悠久，裝修比較傳統周圍都係深色大理石，打卡就麻麻地啦。
每位 $298 加一 (然後好多張信用卡減番一)
地址：灣仔港灣道1號
2. Artistry Brewing Company (A.B.C)
- 環境 ⭐️⭐️⭐️
- 食物 ⭐️⭐️⭐️⭐️⭐️
- 服務 ⭐️⭐️⭐️
- 打卡 ⭐️⭐️⭐️⭐️⭐️
之前見有 blogger 介紹呢間環境同食物都極度上鏡嘅餐廳，原來係位於北角嘅 A.B.C，地鐵B1出口好快到。去到其實大部分枱都好逼又間晒板，我係訂位時講左話要近門口果張四人枱所以就坐得舒服啲，影相又靚。食物質素呢間真係好超班，每一碟都精心設計，好味而且食好多都冇飽滯感。午餐連飲品約 $88-150；蛋糕約 $60-70 一件好大份；咖啡單叫$40-50 勁好飲，冇加一。
地址：北角錦屏街東發大廈地下
3. Cafe Grey Deluxe at Upper House
- 環境 ⭐️⭐️⭐️⭐️
- 食物 ⭐️⭐️⭐️⭐️
- 服務 ⭐️⭐️
- 打卡 ⭐️⭐️
Upper House 個景咁靚又五星級，下午茶只係$480 兩位諗住好抵啦，點知我地後面面張枱個女人對腳兩個鐘冇合埋過，講嘢仲好大聲 😭 餐廳食物同裝修設計我係好滿意嘅，不過每枱距離唔夠一米，用透明膠板間住，酒店黎講算逼。宜家入去 Upper house之前一定要做抗疫問卷，個問卷剩係得英文同簡體字；我哋擺明講廣東話，但所有侍應都同我哋講廣東話口音嘅英文，5:30開始喺我面前大動作地睇錶。平日都全場滿座，就只有一兩個侍應係五星級態度，其他都 OK 嘅不過就唔似做開酒店。
地址：Level 49 The Upper House Pacific Place 88, Queensway, Admiralty
4. Cobber Coffee & Tony’s Pastry
- 環境 ⭐️⭐️⭐️⭐️
- 食物 ⭐️⭐️⭐️⭐️⭐️
- 服務 ⭐️⭐️⭐️⭐️⭐️
- 打卡 ⭐️⭐️
近排好鍾意食梳乎厘班戟，每次見到邊間餐廳有都會即刻去試。呢間位於觀塘工業區，好近APM，棟大廈都好四正乾淨。星期六去要排隊半個鐘先入到，但果然名不虛傳，咖啡同班戟都好高質素！雖然餐廳冇窗冇景，不過裝修有 taste而且每張枱有一定距離，都坐得好舒服。搞笑嘅係要用自己電話 scan QR code點餐，我同個美國人朋友去，餐牌係有英文版嘅，但就充滿香港特色！例如每杯嘢飲都有得揀少冰少甜 light ice less sugar 再揀要咩奶；我哋問侍應個班戟可唔可以後上，點知原來個電子餐牌都有得揀 “Hold” 叫起，真係諗得好周到。午餐每款$100左右，可以加$20轉特色咖啡；班戟有好多款$100至$150，另外仲有幾款小食，都幾多嘢揀。
地址：觀塘駿業里8號世貿大樓1樓
5. 同場加映中伏系列…
朋友話約去中環食 Tea，我見到呢間 Dear Lilly 都幾多人介紹又靚景又唔貴即刻 book啦。Afternoon Tea for two $318 加一，ifc 黎講算好平，點知… 底層三文治正正常常，食到上一層甜品就開始出事，有舊心形白色啡色奇奇怪怪嘅嘢，嘩勁難食，朋友話有火麻仁味，真係中西合璧；再嚟藍色嗰舊馬卡龍，唔試過都唔知馬卡龍都可以難食；上面嗰兩舊英式scone就OK。唔係我哋幾個腌尖，見到隔離枱都冇乜點食中間嗰層。仲有杯 iced cappuccino， 真係唔知道原來咖啡都可以咁難飲。聽講佢午市同晚市係好食嘅，下午茶就近幾個月先開始劣評如潮，我地真係唔好彩啦～
❤️❤️❤️
Chairwoman 